PROIEKTU HAU EGITERA BULTZATU
GAITUZTEN ARRAZOIAK
Neurobiologia, garun-paralisia, gaitz
neurologikoak edo espastismoa hitz teknikoak dira; eta ez dira, ez, edonork
ulertzeko modukoak; adituek eta zientzialariek sintoma zehatzak izendatzeko
asmatutako terminoak dira: gaitzak aletu, xehe-xehe egin, eta ikerketa- zein
doktorego--tesietan milaka zero eta bat zenbakien bidez artxibatzeko sortuak. Definizioa zehatza dute. Milimetrikoa.
Bada, ez gara hemen hitz horien esanahiaz,
zientzialarien ezinbesteko lanaz edota ikerketa zientifikoei buruz luze
arituko. Argi gera bedi, gizakion bizi itxaropen eta bizi kalitatearen
hobekuntzaren alde egiten duten lana txalotzekoa iruditzen zaigu. Ildo
horretatik, gaitz arraroen ikerketarako dirua biltzeko lanean diharduten
taldeen lana goraipatu nahi dugu: bihoakie besarkada handi bat gure aldetik,
ikerketa zientifikoak bultzatzeko lanean diharduten talde eta erakunde guztiei.
Alabaina, gaitz neurologikoak dituzten
norbanakoen bizi kalitatea, terminologiaz haratago doa. Izan ere, euren zoriontasuna eta familiarena, neurri
handi batean, gizartean onartuak izateko duten ahalmenak baldintzatzen du.
Beste era batera esanda: osasuna, elikadura, oinarrizko zerbitzuak eskura
izatea, denbora librea izatea... norbanako guztion zoriontasuna eta bizi
kalitatea baldintzatzen duten elementuak dira; baina testuinguruan elkar
ulertzeko eta onartuak izateko dugun gaitasunak ere gure ongizatea
baldintzatzen du. Izaki sozialak garen heinean gizataldeak osatzen ditugu, bizirik
irauteko eta zoriontsuak izateko ingurukoen beharra daukagulako.
Baina Itxaso bezalako haurrek komunikatzeko
era ezberdina daukate; sarritan leku batetik bestera joateko denbora gehiago
behar dute, edo zenbait gauza egiteko laguntzaileak behar izaten dituzte.
Ezaugarri horiek dituzten haur “berezi” asko hezkuntza-programa berezietan
sartu dira, eta gabezia neurologikorik ez duten haurrekin eskolak konpartitzen
dituzte. Baina beste askok ez dute aukera hori.
Gurea esaterako, eta gurea bezala beste
batzuk, “euskal eskola inklusiboaren plana”deritzon
hezkuntza-programatik kanpo gelditu dira. Hori dela eta, eskola berezietara
joan behar dute. Horrek hainbat ondorio zuzen ditu haurrengan eta euren
familiengan: ez dute gainontzeko haurrekin harremanik lantzen –eskola-orduetan,
behintzat–, gurasoak ez dira gabeziarik ez duten haurren gurasoekin
erlazionatzen, e.a.
Egoera
honek haur bereziak eta euren familiak isolatzea eragin dezake. Are gehiago, haur bereziekin kontakturik ez daukaten lagunek ez dute
inoiz haur horiekiko enpatiarik garatuko, eta horrek haur “berezien” esklusioa
areagotu dezake. Mugako egoeran bizi den norbanakoak (ordutegi luzeak, zainketa-lanak,
sendagileetara bisitak, kezkak...) nekez eutsiko die pozari eta alaitasunari,
lagunekiko harremanek kale egiten badiote. Horrek guztiak eragina izango du senideengan, etxeko
testuinguruan, familia barruko harremanetan, eta besterik egin ezean, haur
bereziengan modu negatiboan eragingo du.
2013. urtean ASPACEk egindako
ikerketaren arabera, Euskal Herrian 500 pertsonatik batek gabezia neurologikoa
du. Norbanako guztiok gizarteko esparru
guztietan onartuak izateko eta zoriontsuak izateko eskubidea dugula
abiapuntutzat hartuta, eta familia hauek, arestian aipatu den bezala,
esklusio-arriskuan daudela ikusita, dokumental honen bidez pertsona horien
guztien egoeraren berri eman nahi dugu, Itxasoren eta Maierren bizitza
adibidetzat jarrita. Gure helburua, azken finean, milaka lagun horien
gizarteratzean –inklusioan– gure
aletxoa jartzea da.
No hay comentarios:
Publicar un comentario